دمنا
كريم بدا يترجع لورا، غروره اتكسر تماماً، وبدأ يتحول لشخص بيترجى:
— ندى.. طب اسمعيني أنتِ.. عشان خاطر يوسف.. إحنا ممكن نبدأ من جديد، أنا هتعالج، وهروح لدكاترة النفسية، وهعمل كل اللي تطلبيه.. بلاش تهدي بيتنا!
بصيت له بمنتهى الهدوء.. الوجع اللي كان جواه ألسنة طويلة اتطفا، والدموع اللي نزلت مني زمان تحولت لجمود تام. قربت منه خطوة واحدة، وبصيت في عينيه مباشرة:
— البيت اتهد يوم ما أنت قررت تطردني منه بقلب بارد.. اتهد يوم ما رمت الفطور في الحوض ويوم ما سميت ابنك “ابن حرام”.. يوسف هيكبر وهيعرف إن أمه صانت نفسها وصانته، وهيعرف إن أبوه اختار يظلمها بدل ما يقف جنبه.
— ندى.. أرجوكي!
— الورق هيوصلك من المحامي بتاعي.. الطلاق هيكون هادي وبكل حقوقي، ويا دوب هتشوف يوسف في المواعيد اللي القانون هيحددها، ده لو وافقت أصلًا إنك تقابله من غير إشراف.
فاطمة مسكت إيدي وبستها، ودموعها نازلة على إيدها:
— سامحيني يا بنتي.. أنا ظلمتك لما مشيت ورا كلامه وصديتك.
— المسامحة ربنا اللي بيسامح يا طنط.. بس أنا مش زعلانة منك، أنتِ جيتي ورديتيلي اعتباري قدام الناس اللي اتهاموني في شرفي.
فاطمة لفت لكريم وقالتله بنبرة حاسمة:
— اركب العربية.. حسابك معايا جوه البيت لم ينتهي.
كريم بصلي للمرة الأخيرة، كان شكله مكسور ورخيص جداً.. الشاب المغرور اللي كان فاكر إن فلوسه ونفوذ عيلته هيحموه، خرج من الشارع وهو مش حيلته حاجة.. اتطرد من شركة أهله، اتسحبت منه شقته، وخسر مراته وابنه للأبد.
عدت الشهور.. ورجعت لحياتي وشغلي وأنا مرفوعة الراس. يوسف كبر شوية وبقت ضحكته تملى عليا الدنيا، وكل ما أفتكر اللمبة الخضرا بتاعة الكاميرا، أبتسم وأعرف إن ربنا لما بيحب يظهر الحق، بيبعت أسباب صغيرة أوي عشان تكسر أكبر الكدابين!
