تلبسي حفيدي
— هي استغلتك؟ —قلت ببرود تام وانا بقوم أقف—. ولا انت اللي كنت فاكر نفسك نصح وبتلعب على الحبلين؟ فاكر إنك بتخدعني انا عشان ماسكة مصاريف البيت وعامل حسابك إن أهلك هيفضلوا يمولوا سفرياتك وهداياك؟
بصلي وعينيه مليانة دموع ورعب:
— ندى.. ارجوكي.. احنا بيننا مروان! بلاش تخربي بيتنا عشان نزوة أو غلطة! انا اتخدعت فيها!
— البيت اتخرب من 5 شهور يا طارق —رديت عليه وانا بلم أوراقي وحاجتي في الشنطة—. من قبل ما مروان يتولد اصلاً. انت مش بس خنتني، انت استغليت اسم ابنك وتعب حملي وعلاجي عشان تغطي على وسختك.
الحجة ثريا قامت وقفت وصوتها كان بيترعش من القهر:
— الفلوس دي كلها هترجعلي يا طارق.. جنيه ينطح جنيه. والشقة دي مش هتدخلها تاني لحد ما تحل مشاكلك ونسدد ديونك، ولو ندى طلبت الطلاق انا بنفسي هقف معاها في المحكمة واشهد ضدك!
— أمي! انتي بتقولي ايه؟! —طارق صرخ وهو مش مصدق.
— بقول الحق اللي انا عميت عنه بسببك! —ردت عليه وهي بتبصلي بعيون مليانة ندامة—. سامحيني يا ندى.. يا بنتي انا ظلمتك، وكنت فاكراكي مقصرة في حق ابني وبيتك، وطلع هو اللي بياكل في لحمك ولحم ابنك.
أخدت شنطتي وبصيت لطارق بصة أخيرة، كانت بصة انهت كل حاجة كانت بيننا في لحظة:
— المحامية بتاعتي هتتكلم مع محاميك. الورق كله هيوصلك، وحق مروان ونفقته وحضانته مش هتنازل عن مليم واحد فيهم. والـ 180 ألف بتوع أمك، انت اللي هتدفعهم من رقبتك.
خرجت من باب الشقة وصوت صراخه ومشاجرته مع أبوه وأمه مالية العمارة.
بعدها بأسبوعين، كانت إجراءات الطلاق والقضايا شغالة بكل هدوء عن طريق المحامية الأستاذة فايزة. طارق حاول يكلمني مئات المرات، يبعت رسائل اعتذار، يتوسل، ويقول إنه قطع علاقته برانيا وإنها كانت نصابة واستغلته. بس كل محاولاته كانت بتبتطم بحيطة سد.
عرفت بعدين من نورهان إن رانيا لما عرفت إن طارق اتكشف وأمه قطعت عنه الفلوس ومبقاش حيلته حاجة، حظرت أرقامه كلها وكملت فرحها على كريم عادي جداً، وطارق أكل الضرب من كل ناحية: خسر مراته وابنه، خسر احترام أهله، وشغله بدأ يتأثر بسبب الحالة النفسية والديون اللي أمه ألزمته يردها بالكامل من مرتبه.
انا بقى.. رجعت لبيتي وأهلي، كملت شغلي في شركتي بتركيز وأمل جديد، ومعايا مروان اللي مالى عليّ الدنيا. اشتريتله كل حاجة حلوة بنظافة وبفلوسي الحلال، وحطيت كل القسوة والإهانة دي ورا ضهري.
