مش هدى لامك
في تسجيل منهم، كان صوت سامية واضح وهي بتعيط وتترجى:
— يا حاجّة صفاء، وحياة عيالك لاردلك كل جنيه على داير مليم كل شهر.
المحامية أول ما سمعت التسجيل ابتسمت وقالت:
— عدم وجود وصل أمانة بيصعّب الشغل شوية، بس التسجيلات والإيصالات دي تثبت إنها سُلفة مش هدية ولا هبة!
رفعت قض\ية رد المبلغ، وفي نفس الوقت ركبت قض\ية الطلاق. حسام لما استلم الجوابات استهزأ بيا وبعتلي رسالة:
— ارفعي اللي ترفعيه.. كمان كام شهر هكون بمسك أكبر مطعم في مصر.
ما ردتش عليه.. وفي الوقت اللي كان عايش فيه أحلام الفتى الطائر، طلبت من المحامية تبحث ورا حقيقة ممتلكات نورا وأهلها.
المفاجأة الأولى جت قبل الجلسة.. البرج الـ 5 دور طلع موجود فعلاً، بس مش ملكها ولا ملك عيلتها! نورا كانت مجرد مأجرة شقة قانون جديد هناك لفترة ومشيت.
المفاجأة الثانية كانت أكبر: البنت طلعت نصابة ومشتغلة كذا حد قبل كده ومفهمة الناس إنها بتشغل فلوسهم في مشاريع وهمية!
قلبي حن شوية وحبيت أحذر حسام.. كتبت له رسالة فعلاً، بس مسحتها قبل ما أدوس إرسال. هو خد كل الفرص عشان يظلمني واختار إنه يكسرني ويقل مني.
في المحكمة، سامية أصرت قدام القاضي إن الـ 500 ألف جنيه كانوا “هدية من أم العروسة”.
المحامية طلبت الكلمة، وطلبت تفريغ الحسابات البنكية اللي مكتوب فيها في خانة السبب: “قسط سداد الدين”. وبعدها شغلت تسجيل الصوت وهي بتتوسل لأمي، والرسائل اللي كانت سامية بتتحايل فيها على أمي تخفض القسط شهر عشان تشتري تلاجة للمطعم.
وش حماتي جاب ألوان واصفر:
— ده.. ده ما يثبتش حاجة!
المحامية قاطعتها بثقة وكشفت المستور، والقاضي رفض حجة “الهدية” تماماً.
سامية اتزنقت واضطرت تعترف بالدين وتكتب تعهد بالسداد، وحسام كمان لبس في مصاريف الطلاق والنفقة. ويوم ما مضينا الورق الرسمي، بص لي بابتسامة سمجة وقال:
— خدي فلوسك واشبعي بيها.. أنا أخدت المستقبـل كله!
بعدها بتلت شهور.. جالي تليفون من واحدة صاحبتنا مشتركة.
نورا فص ملح وذاب، واختفت تماماً!
ومش بس كده.. أخدت معاها تحويشة عمر حسام، والسيولة اللي كانت في خزنة مطعم سامية، والفلوس اللي جمعوها من الناس عشان يفتحوا بيها “الفرع الجديد”!
سمعت الخبر من هنا، وحسيت إن قلبي بيطبل.. مش شمتاتة، بس العدل لما بياخد مجراه وبيترد لأصحابه بيبقى له طعم تاني خالص.
