اليوم
— أنا بنت عمتي دكتورة نسا وعيادتها على بعد 10 دقائق من هنا، لو عاوزين كشف سريع هي شغال دلوقتي.
نور رفضت بهستيريا وتوتر يثير الشك:
— لا! أي مستشفى تاني إلا العيادة دي!
كريم استغرب ورفك حواجبه:
— لو فعلاً خايفة على الجنين، تفرق معاكي إيه العيادة؟
نقلوا نور تحت حراسة أمينة شرطة.
لما وصلنا العيادة، كنت هفطس على نفسي من الضحك والتوتر: طلعت نفس العيادة اللي بشتغل فيها في المهندسين!
وبنت عم كريم طلعت هي الدكتورة نهى.
نهى شافتني مصوبة ومضروبة بس ما سألتش ولا كلمة، دخلت مع نور وأدت شغلها بضمير ومهنية عالية.
بعد نص ساعة خرجت نهى وقالت للظابط:
— مفيش أي أثر لإصابة أو حالة إجهاض، الجنين مستقر تماماً.
نور صرخت:
— بس أنا حاسة بوجع شديد!
— الوجع النفسي والوهمي بيحصل حتى لو الفحوصات سليمة، لكن طبياً مفيش أي مانع يمنعها من سؤاله والتحقيق معاها في النيابة أو القسم.
وهنا حصلت المفاجأة الأولى اللي محدش كان متوقعها.
نهى بصت لأمينة الشرطة وقالت:
— في حاجة تانية.. المريضة كانت عندي هنا الصبح. بحكم سرية المهنة ما أقدرش أطلع ملفها الطبي إلا بطلب رسمي، بس لو في تحقيق رسمي، النيابة تقدر تطلب الملف وتشوف اللي فيه.
نور جسمها بدأ يترعش كله.
ما كانش مجرد خوف إن ملعوبها اتكشف..
كان خوفها لأنها عارفة إنها سابت وراها دليل ملموس.
اتصلت بـ أحمد.
جه بعد 40 دقيقة، شافني قاعدة بحط ثلج على ضهري وشاف نور واقفة جنبها أمينة شرطة.
— أمي.. في إيه؟ إيه اللي حصل؟
فتحت بقي عشان أتكلم، ما قدرتش، العبرة خنقتني.
نور هي اللي سبقتني وصرخت:
— أمك مشيت ورايا واعتدت عليا وعاوزة تخرب بيتنا وتدمر فرحنا!
أحمد بصلي بذهول:
— الكلام ده بجد يا أمي؟
قلبي اتكسر ميت حتة من نظرته.
وقبل ما أرد، كريم رفع إيده وتدخل:
— أنا ما أعرفش والدتك ولا عمر شفتها، بس أنا شفت راجل بيزقها على الأرض وسمعت خطيبتك بنفسي وهي بتقول عليه “أبو البيبي”.
أحمد عينيه اتثبتت ومبقاش يرمش.
نور صرخت:
— كذاب! ده متفق معاهم!
أحمد ما اتخانقش.. طلع تليفونه بهدوء، فتح أبلكيشن البنك ووراني تحويل رسمي:
— طب فسرؤلي التحويل ده؟ أنتِ من 3 أيام طلبتي مني 400 ألف جنيه عشان تسددي مديونية شقة أمك.. ليه الفلوس دي أتحولت على حساب الراجل ده بالذات؟
نور أتخرست تماماً وما نطقتش كلمة.
