شهر العسل
في القاهرة… الكابوس الحقيقي بدأ.
أهل إسلام جم البيت عندنا يعتذروا، واعترفوا إنهم كانوا عارفين بالست الثانية، وكانوا فاكرين إن إسلام “هيعقل ويهدى” لما يتجوزني!
أبويا أخدته العزة وطردهم برة البيت.. ودي كانت أول مرة في حياتي أشوفه بياخد حقي ويدافع عني.
بعد شهر كامل.. إسلام اتصل!
— مي.. هي سابتني ومشيت. أنا غلطت.. ممكن نصلح اللي فات ونرجع؟
— وهترجع لي المجوهرات والذهب والفلوس اللي سرقتها كمان؟
سكت وما عرفش يرد.
— ما تتصلش بالرقم ده تاني في حياتك.
أبويا والمحامين قدروا يرجعوا جزء من الفلوس والذهب بالقانون، والباقي عوضنا فيه ربنا.
مرت شهور.. عمتي مرزوقة كانت بتكلمني وتقولي إن كريم لسه بيسأل عليا وبيدور عليا.
بس قالت لي كلمة خلتني أقفل باب قلبي بضبة ومفتاح قبل ما أفكر أفتحه تاني:
— كريم عيلته مريشة يا مي.. وأمه بتدور له على عروسة من مقامهم وبنت ناس أغنية. بلاش تدخلي نفسك في مشاكل وجع دماغ تاني.
طلعت الكتاب اللي كريم كان مديهولي.. ومزعت الصفحة اللي فيها رقم تليفونه.
بعد 10 شهور كاملة.. صاحبتي ندى سحبتني بالعافية نخرج نروح كافيه فيه حفلة ومزيكا لايف في المعادي.
— هي ساعة واحدة بس يا مي ونمشي.
الإضاءة هديت في المكان.. وطلع شاب طويل ماسك جيتار في إيده.
كان كريم!
وقفت بسرعة عشان أهرب وأمشي.. بس أول ما مسك الميكروفون وبدأ يغني، رجلي اتسمرت في الأرض.
النغمة كانت هي هي..
وبعدها سمعت كلامي اللي قلتهوله على البحر:
“لو حد سرق مني الربيع… هتعلم أفرش وأزهر مع مطر تاني…”
وقفت مش قادرة أتحرك ولا أتنفس.
أول ما خلص الأغنية، كريم بص في أخر القاعة، عينيه جيت في عيني وسط الناس كلها.. ومسك الميكروفون وقال بصوت مسموع للكل:
— مي… أنا بقالي 10 شهور بقلب الدنيا عليكِ!
الكابوس كله اتحول لذهول في الكافيه. وشي احمر وحسيت بنفس السخونية اللي حسيتها يوم فرحي، بس المرة دي ما كانش كسوف ولا عار. كريم نزل من على المسرح وهو لسه معلق الجيتار في رقبة.
— ليه عمرك ما اتصلتي يا مي؟
— عشان ما كانش معايا أي حاجة أقدمهالك غير المشاكل ووجع الدماغ.
— أنا ما طلبتش منك حساب في البنك ولا سمعة معصومة من الخطأ!
— أهلك عايزين لك واحدة ثانية من مستواكم.
— أهلي عايزين حاجات كتير… بس أنا اللي بختار حياتي.
خرجنا نتمشى ونحكي. كريم حكالي إنه راح لبيت عمتي 3 مرات، ولما محدش رضي يديله عنواني في القاهرة، بدأ يلف ويغني في كافيهات ومسارح القاهرة كلها، لأنه كان فاكر إني بحب الأماكن دي.
