كبير العيله ج2

ابتسامة مرحة ارتسمت على وجه ذاك الذى يتابع وقد علت عيناه نظرة فخر ممزوج بالتقدير والانبهار بهذه الصغيرة الجريئة بينما اكملت هى بفخر وهى تشير لاخر:

_ومش عاجبك انه صعيدى وبتتريق على لهجته؟ ليه هو دلوقتى لهجة بلدك تكسف؟!!

علت عينيه نظرة تقدير بينما اكملت هى جادة:

_لعلمك لهجته وبلده دي جزء من ثقافة بلادك واللي المفروض تبقى فخور بيها

صمتت ثم رفعت ذقنها بكبرياء وهي تكمل بفخر:

_الصعيدى اللى مش عاجبك وبتقول فيه نكت دة هو اللى مازال محافظ على عادات وتقاليد بلدك، الصعيد اللى بتتكلم عنه ده مازال محتفظ بدفئه، واهله مازالو محتفظين بقربهم.

الصعيدى اللى بتتكلم عنه ده مازال محتفظ باحترامه وادبه واخلاقه، مستحيل تروح الصعيد وتلاقى عرى بالعكس كله ملتزم بلبسه ومحتشم.

الراجل الوقور والمحترم هنا بيقولو عليه صعيدى، الشديد فى تربية اولاده بيقولو عليه صعيدى، الراجل اللى كلمته واحدة بيقولو عليه صعيدى، الراجل اللى بيرفض قلة الادب بيقولو عليه صعيدى.

الصعيد فخر لانه منبع عادات وتقاليد اكتسبناها من ادياننا كلنا، عادات اتنازلنا عنها واخلاقيات سبناها بس علشان التمدن وعلشان نبقى اسبور واصبح اللى ملتزم نقول عليه صعيدى ورجعى وفلاح وللاسف بقينا بنلزق لعادات بلاد تانية ملهاش حضارة ولا ماضى بس علشان نبين اننا متحضرين.

التمعت عيناه بالفخر وهو يستمع لحديثها الذى اصمتهم جميعا وبالاخص حينما انهت كلماتها قائلة بجدية وفخر:

_واذا كان ده بقى عار كونك انك صعيدى او فلاح فانا حابة اقولك ان انا اساسى من الصعيد، واهلى صعايدة، ومازالو بيتكلمو صعيدى بس انا لا لانى ببساطة اتولدت هنا.

اتسعت ابتسامته اكثر وعلىٰ الانبهار عينيه وزاد تقديره لها لذا ودون شعور منه تقدم وهو يصفق لها بيديه ليعلو التصفيق لها بالقاعة و الكل ينظر لها بتقدير واحترام ليهز راسه بتقدير لتبتسم وقتها بخجل ولكنها مع ذلك ظلت تنظر جهته منتظرة توضيح لكينونته لتجده يتحرك يقف على منصة الشرح ليقول بجدية وهو يشير بيده لها بالجلوس:

_احب اعرفكم بنفسى، انا الدكتور عُدى الزهار، وانا هنا هدرسلكم تاريخ مصر الحديث

توقف الجميع ينظرون جهته بانتظار ما سيقوله بينما نظرت هى جهته بصدمة حينما سمعت اسمه، امعقول هذا؟ اهو من عائلاتها فعلا ام هو مجرد تشابه اسماء؟ وان كان من عائلتها اذا ابن من؟