كبير العيله ج2
تجمد صُهيب مكانه من اجابتها وهو يسألها ببلاهة:
_هاه
كتم يونس بالكاد ضحكته عن ان تخرج مجلجلة فى المكان ولكنها خرجت بالفعل ولكنها ساخرة حينما سمعها تكمل بحسم:
_ والتانية بقى ياريت متحاولش تتعرضلى تانى ابدا لا بحلو ولا وحش، انا ليا اب ربنا يخليه ليا لما احتاج حاجة هقوله، وليا لسان اطلب، فياريت تلتزم بمبادئ الصعايدة وملكش دعوة بالحريم
انهت كلماتها لتنسل من بينهم وتذهب وكأن شيئًا لم يكن تاركة احدهم واقف فاغر فمه والاخر ينظر لها بسعادة وكإنه يرى ربيبته تكبر امامه وما ان لاحظ ابتعادها حتى ربت يونس على كتفه هامسا بتحذير:
_بنت الزهار مش ناجصها حاچة علشان تروح للغريب، وولاد الزهار ميحبوش حد يجرب من بناتهم لان دي فيها جطع رجاب، فبلاش تتحدانا فى الحتة دي يا ولد الچمال
انهى كلماته ليتحرك يعود ليصعد سيارته وما ان اقترب منها حتى اطلق الزمور
لفت روفان بوجهها تتطلع لمن خلفها لتتفاجأ به، نفخت بفمها بضيق ولكنها انتبهت لصوته الحازم:
_اركبي
زمت شفتيها بضيق ولكن امام نظراته الحازمة لم تملك سوى أن تنفذ امره لتصعد بجواره ليبدأ فى القيادة بينما اشاحت برأسها للجانب تنظر للطريق بشرود لتنتبه لصوته وهو يقول من بين اسنانه بغيظ:
_وبعدهالك يا بت الزهار؟
رفعت روفان عينيها جهته بتعجب تماشيا مع ايقافه لسيارته لتساله وقتها بتعجب:
_تقصد ايه؟
اعتدل يونس فى جلسته يجيبها بحنق:
_هو انا موراييش غيرك!! ايه همشي ابعد الرچالة عنيكِ ولا ايه؟ مرة البلوة اللى چيبتيهالنا، ومرة الواد بتاع الموجف الصبح وصُهيب اخر النهار، ايه هو مفيش غيرك؟!!
اتسعت عيني روفان بصدمة من حديثه الوقح الموجه جهتها لترفع سبابتها جهته هادرة بغضب:
_ انتبه بتقول ايه يا ابن الزهار، انا مقولتلكش تمشي ورايا، ولا انا عاجبني اللى بيجرو ورايا دول.
انا لا عايزاك ولا عايزة اى راجل اصلا لاني قرفانة وانا عارفة هما شايفيني ازاى وعايزين مني ايه؛ وده خلانى كل اما اشوف راجل احس انى هرجع لانى مبقتش لاقية رجالة اصلا الا من رحم ربى ودول مبيشملوش غير ابويا وعمي بس
اتسعت عيني يونس بصدمة وهو يجدها تضعه هو فى ذات الخانة مع اشباه الرجال هؤلاء بينما هى اكملت بغضب وهي تشيح بيديها بحنق ودموعها تسيل على وجنتيها بقهر:
_بكفياك بقى يا يونس بيه، مش كل اما تشوفني هتسم فى بدني وتكرّهني فى نفسي اكتر، عرفنا انى غلطت وانى كنت ساذجة وندمت على غلطتى بس خلاص بكفياك، انت متعينتش جلاد عليا علشان فى الرايحة والجاية تقطّم فيا.
