كبير العيله ج2

نظر لها عُدي بطرف عينه ولم يستطع ان يمنع نظرة اعجاب من الطوف بها ولكنه مع ذلك اكمل جادا:

_ وبما انكم فتحتو الموضوع مع انه مش وقته

نزع عنه حقيبته يضعها على المقعد ثم ألقى كتابه على المكتب امامه ليميل بعدها يضع كفيه على طاولته قائلا بجدية خطيرة:

_احب اعرفكم بقا انى صعيدى، صعيدى ابًا عن جد، ولولا انتدابى هنا كان زمانى بدَرّس فى جامعتى في سوهاج

تراجعت رأسها للخلف وهى تتأكد الان انه من عائلتها بينما اكمل جادا:

_وزى ما قالت الانسة، وزى ما كنت بتكلم مع ابن عمى من كام يوم، اللى يخجل من اصله او عرقه او دينه يبقى ميستحقهوش، وان كنت بتكلم قاهرى فمش خجلى من لهجتى ولا حاجة بس علشان الكل يفهم مش اكتر، لكن انا عمرى ما خجلت من بلدى لانها مفيش حاجة تكسف بالعكس فيها احترام وادب واخلاق وترابط بين الناس ومحبة.
ولو جينا نتكلم عن العلم ففيها دكاترة ومهندسين ومدرسين.

ولو قولنا حضارة ففيها اثار كتير جدا بيحيلها الناس من العالم كله اذا كانت اثار دينيه زى الاديرة اوحتى فرعونية
زى الاقصر واسوان وزي مدينة اهناسيا اللى كانت عاصمة مصر القديمة زي ما درستو.

اما بالنسبة للفلاحين فحابب اقولكم ان فيه فلاحين بيملكو اموال اكتر من اللى بيملكوها رجال الاعمال وموجودين فى الصعيد

صمت ليكمل بشموخ وهو يرفع ذقنه لاعلى بكبرياء قائلا بفخر:

_زى عيلتى مثلا، عيلة الزهار واللى مشهورة فى الصعيد وتعتبر من اغنى العائلات فى مصر كلها بس هى متحبش الشهرة والتلفزيون

صمت ليقول ساخرا:

_وبحب فطار بلدى عادي ومعرفش افطر غير فول وطعمية

ضحكت لينا بخفوت ليبتسم لها بمرح وهو يقول ساخرا:

_اصل التوست والمربى دة ميعملش معايا حاجة

ضحك الجميع بشدة بينما صمت ليكمل جادا:

_اتعودو متبصوش بطبقية للناس لا لعرق ولا لاصل ولا لمستوى اجتماعى لان ممكن اللى بتتريق عليه يكون افضل منك، علشان كدة لما تبص لحد بص لادبه واخلاقه واحترامه وكون انه ملتزم ولا لا لكن غير كدة تفاهة، وانا اللى شايفه قدامى تفاهة

صمت لينظر لهم بغير رضى:

_اتفضلو يا شباب المستقبل نبدا محاضرتنا

نظر له الجميع بانتباه ليلقى نظرة اخيرة عليها قبل ان يبدا فى القاء محاضرته وسط هدوئها وقد عادت لطبيعتها الهادئة المنطوية المعتادة
ـــــــــــــــــــــــــــــــــــــــــــــــــــــــــــــــــــــ